قصيدة ايزيس (هشام الجخ)

قصيدة ايزيس

واقفة على الكورنيش
تعرى وشها للكل
ماهيش مكسوفة وبتضحك
تمد ايديها فى العتمة
تلون جسمها الناحل
بتتعاطى حبوب للهلوسة وتنام
على فدادين من الاشواك
ماهيش حاسة
وهى بتنزف
ووش النيل بهت غضبان
ايزيس فى دايرة النسيان
تلف . تلف ما بتقدر
تلملم شعرها المفلوت
تميل على خوف
ومنها الخوف
وبرد وساقعة جلبابها
رياحها تشد فى جذورها
مكانها ينوح على الذكرى
بيستسلم فى حلقه الموت
ايزيس
فى سكوت وماله حد
ما تقدر ع الكلام ابدا
ولا بتسمع ولا بتشوف
بتحبى فوق اراضى الوحل
هناك
اوزوريس بيتقطع
آلاف وآلاف من الاجزاء
رخيص اوزوريس
فى كل مزاد
وبيعه سهل بالآجل
وبالنقدى بربع ريال
رياح تاخده
رياح ترميه
وتوهة تلفه دوامة
على خيانة
وخسة عنيدة ملعونة
تطلع له لسانها
وتحبس جوه انفاسه
الم مدفون
جريح والجرح متلوث
بخوف والليل بياكل فيه
ينادى ونبضه بيردد
آهاته فى كم جلبابه
********
ولسه حبها فى قلبه
يتوه والحب متعلق
فى قلب سؤال
على لسانه
لأمتى ايزيس هتنسانى
وليه ما تلم عاشقها
وتحضنه حتى لمماته
يا طير العشق يا محبوس
ماهو انت الشاهد الأول
على حبي وإخلاصها
زمان كانت بتحضنى
تلملم فيا وتخبى
في قلبها كل أوصالي
زمان يا إيزيس
زمان وزمان
وطير العشق كان بيطير
يغنى لوجهك الصافي
فى كل صباح يطير بالحلم
وكل مساء ينام في الحلم
ليه يا إيزيس بتنسي الحلم
تصيري لوحة مجنونة
تتوه ملامحنا جواها
ومين اصطاد طيور العشق
وغير كل أغانيها
لعدودة في قلب حبيبك المكسور
رتوش العار على جسدك
ودار مهجورة في عينيك
كهوف الصمت مفتوحة
على أحلى أغانيكِ
بناديكِ
يا أحلى صبية في عينيا
يا وجعي يا كل أحزانى
مساحة العشق
ممدودة ومزروعة
بصبر تقيل بآلامي
مكان خطاويكِ متعلم
عليها وكل أحلامنا
نقوش بتنوح على الأطلال
تناديكِ وأناديك
حاولي تقومي من نومك
وقاومي الهلوسة والخوف
خدي جلدي ده جلبابك
وقومي اتغطى من عارك
وشيلى العتمة من بدنك
وحاولي تلمي اوصالى
أنا مقدرش أعيش دونك
أنا مقدرش أشوف غيرك
يا أحلى غرام مبقدرش
أنام غير وانت في احضانى
- على الكورنيش
تعالى نحنى خطاوينا ونتمشى
- مبقدرش
هاتى يدك على يدى
وحاولى ياله وتساندى
- مبقدرش
خدي قلبى يقويك
خدي روحي خدي دمى
خدي حبي وإخلاصي
- مبقدرشى
- تعالى ياله فوق حضني
نغنى ياله نتعلم
حروف العشق م الأول
الف . حاء
وباء كاف
احبك قولى
- مش قادرة
- حاولي ياله واتهجى
- مانيش قادرة
- حاولى ياله من تانى
- ا ل ف . ح ا ء
وب ا ء . ك ا ف
ا ح ب ك
- قولي رددي تانى
- احبك
- قوليها رددي تانى
احبك